ஏதோவொரு கிரேக்க தெய்வத்தின் சாயல் அவன்
சில தருணங்களில் டாஃப்னியைப் பின்தொடரும் அப்பலோ
பல இரவுகளிலும் சில பகல்களிலும் டையனஸிஸ்
தற்போது தொலைவில் எங்கோ
துணையாய் அவன் போர்வையின் வெப்பம்
இன்னும் சில நினைவுச் சிதறல்கள்
வானின் மேகங்களென
மெதுவாய்ப் படர்ந்து கரைந்திட
விழிநிறை நெடுவானின்
நீலமுமாய் அவன்
மீண்டும் தெய்வத்தின் கூர்மூக்குத் தீண்டல் வரையில்
போதுமிந்த கொள்ளா நீலம்
- வெண்பா கீதாயன்
ட்ரெவி நீரூற்றில் அவள் வீசிய இரண்டு நாணயங்கள்
அவளது இச்சைகளை நிறைவேற்றின
அழகியதொரு கூடலும் அளவானதொரு பற்றும்
எஞ்சிய மூன்றாவது நாணயத்தை
அவனது சட்டைப்பையில் விட்டுச் சென்றனள்
மறுமுறை ஒரு பொழுதினில் அவனுடனான சந்திப்பு
மீண்டுமொரு கூடல்
தேவதையின் கொடையென
மறுநாள் துயில் கலைந்தவளுக்கு
ஒரு கோப்பைத் தேநீருடன்
அவன் உள்ளங்கை வெப்பம்
அவளது பகற்கனவுகளில்
சன்னதமாடும் தெய்வங்களில் ஒன்றாக
வெகுண்டது மூன்றாவது நாணயம்
ரோம் நகரின் ஏதோவொரு எல்லையில்
தனித்த மணத்துடன் எழுந்த ஒரு காட்டுப்பூ
காவலுக்கு ஓர் அணங்கு
வீனஸ் தன்னிலை தவறி விழியிமைத்தனள்
நானோ நொடிதனில்
- வெண்பா கீதாயன்
மெல்லிய க்லெஸ்மர் இசை
இரவு விருந்தில் டார்க் சாக்லேட்
இடையே சில மிடறாய் மது
பொருளற்ற உரையாடல்கள்
பொருளெனச் சிறு சிணுங்கல்
அவள் தோளில் சிதறும் கற்றைமுடி
அருவியாய் இடைநெளிந்தூற
இடைமறித்திடும் அவன் நோக்கு
இருளும் கொஞ்சம் நாணிடும்
தீக்கீற்றல்களாய் மீட்டல்கள்
அவன் பின்கழுத்தின் கூச்சத்தை
தீண்டிடும் நகங்கள்
சாத்தானின் வாசனையாய் படர்ந்திடும் மென்மோகம்
கடவுளின் வழியாய் அவள் அஞ்சன விழிகள்
இரண்டும் அவனுக்கு
இரவின் உண்டாட்டென
- வெண்பா கீதாயன்
மெல்லத் தழுவிடும் சாளரத் தென்றல்
இறுக்கி அணைத்துக் கொள்ளும் தனிமை
விரவிக் கிடக்கும் புத்தகங்கள்
விரல் ஒதுக்கும் ஓரக்குழல்
நிறைந்த அமைதி
மோகித்த கனவுகள்
புரண்டு படுக்கும் உடல்
சாளரத்தின் வெளியே ஒயிலாய் ஆடும் கிளை
இலைகள் காதலில் திளைத்து
இன்னும் சிவக்கின்றன
பச்சைக்குள் நெளியும் நரம்புகள்
மிச்சமாய் ஒரு பரிசு
அவன் அணைக்காமல் விட்டுச்சென்ற
சிகரெட் புகை
அறையையும் கடந்தது
- வெண்பா கீதாயன்
எங்கோ தொலைவில் இசைக்கும் கசல்
மீள மீள
ஈரடி சந்தங்கள்
அன்பைச் சொல்ல இத்தனை சொற்கள்
எத்தனை நிலவுகளைக் கண்டிருக்கும் இப்பிரியம்
நிலவற்ற நாளிலும் கூட பிணைந்திருக்கும்
ஆறு பருவங்களை சந்தித்திருக்கும்
எதிரெதிரே சந்தித்த விழிகள் சொல்லாத களவினை
சொற்களால் அணிசெய்தல் அரிது
எவ்வளவு கரவுகளை உள்ளம் கொள்ளும்
இரவுகளின் முணுமுணுப்பு போல
பாலை மொழியின் இசை தரும் தண்மை
என்றோ சந்தித்த விழிகளின் களவு
அவளது யாழ் மீட்டியது
ஈரடி சந்தங்கள்
மீள மீள
- வெண்பா கீதாயன்
பிரிந்து கூடிடும் முகில்களின் ஒருநாள்
முகில்களற்ற தெளிந்த வானின் ஒருநாள்
பகலில் தெரியும் நிலவின் நாளும் கூட
பொழுதுகள் புலப்படா நாளும் அதுதான்
கருமுகில் உதிர்க்கும் முதற்துளியின் நாளது
அந்நாள்தனில் மொழிந்த சொற்கள்தாம்
கோடைகாலத்துப் பெருமழை
போதும் சொற்கள்
கோர்த்து அணிகலனாய் சுமந்திட
எடை தாளாது
முன்னொருநாள்
அரிவையின் கூந்தல் விலக்கி
சுவாசத்தின் சத்தம் கேட்டிடும் நெருக்கத்தில்
இதயத்தின் முணுமுணுப்பின் அணுக்கத்தில்
அவன் சொல்லிச் சென்ற வரிகள் சில
அவள் மேனியை அணிசெய்திடும் துகில்களென
நாணத்தைக் கவர்ந்து ஒளிந்தவனுக்கு
அவ்வரிகளை நினைவுபடுத்துமோ?
இந்நாட்கள்
- வெண்பா கீதாயன்
பாலைச் சுரமென இரவு
பற்றிட நன்றாய் திண்தோள்
போதிய அளவாய் அணுக்கம்
நுதல் தொட்டு மிடறிறங்கும் வியர்வை
பவழமல்லி ஸ்பரிசமாய் உறுத்தும் மீசை
அறைமுனையில் மிளிரும் இருவிழிகள்
மெதுவாய் இருளில் நகர்ந்தது
ஊடலுக்கு ஆயத்தமாகும் பூனைக்குட்டி
மேசைமேல் குதித்தது
புகைப்படச் சட்டகத்தைத் தட்டிவிட
கொள்ளை பிரியம்
புகைப்படத்தில் முத்தமிட்டுக் கொண்டிருக்கும்
தலைவனும் தலைவியும்
இன்னும் கட்டிக்கொண்டனர்
பூனை அவர்களுக்கு தொந்தரவு ஏற்படுத்தாமல்
அமைதியாய் அறைக்கு வெளியே நடந்தது
- வெண்பா கீதாயன்
